Velkomin í Síðuskóla

Í dag var minna um bóknám í 9. bekk, byrjað var á að horfa á bíómynd en það völdu nemendur sem umbun fyrir vel unnin störf í janúar. Þá tók við heldur en ekki skemmtun. Í gær fengum við nefnilega sendingu frá föður Guðrúnar Dagnýjar sem sækir sjóinn frá Grímsey. Um var að ræða fullan kassa af sjávarkvikindum. Kenndi ýmissa grasa má þar nefna krabba, þorsk, ýsu, rauðmaga og grásleppu, hlýra, blágómu og löngu. Nemendur skoðuðu skepnurnar og fengu svo að krukka í þær eftir að Dagný hafði sýnt þeim hvernig flaka á fisk. Eftirminnilegur dagur og myndirnar tala sínu máli þótt þær sýni ekki lyktina :)

Forvarnardagurinn er í dag 6. nóvember. Síðustu ár hafa 9. bekkingar unnið verkefni tengd forvörnum á þeim degi. Verkefni þetta tók um það bil tvær kennslustundir. Vinnan hófst á því að nemendur komu saman frammi í sal og horfðu þar á ávarp forseta Íslands auk þess sem fulltrúi frá Íþróttafélaginu Þór ræddi við hópinn. Eftir ávarpið var unnið í hópum þar sem nemendur ræddu mál sem tengjast málefninu. Þar var um að ræða  íþrótta- og æskulýðsstarfs, samveru fjölskyldunnar og að hvert ár skiptir máli. Hóparnir unnu veggspjöld og kynntu niðurstöður. Hér má sjá myndir.

Þriðjudaginn 23. 09. var námskynning fyrir 9. bekk í Síðuskóla.  Hér má sjá glærusýninguna sem sýnd var á fundinum.

Kæru foreldrar og forráðamenn!

Eins og ykkur mun kunnugt gerðum við litla skoðanakönnun á því hvort seinnipartur þriðjudags eða miðvikudagsmorgun henti betur fyrir kynningarfund.  22 svör bárust og niðurstaðan varð sú að 11 völdu þriðjudaginn en 8 völdu miðvikudaginn. Þrír gerðu ekki upp á milli daganna. Því boðum við hér með til námsefniskynningar þriðjudaginn 23. sepember kl. 17.30 í stofu 26.

Hlökkum til að sjá ykkur sem flest

Sigga og Siggi

Mánudaginn 8. september var umhverfisdagur í Síðuskóla.  Á þeim degi er áhersla lögð á að vinna með nánasta umhverfi skólans og þar sem miklum tíma af ævinni er eytt inni leggjum við einnig áherslu á að vera úti, enda ekki minna nám sem fer fram í náttúrunni.

9. bekkur fór að þessu sinni Lögmannshlíðarhringinn.  Gengið var eftir gömlum árfarvegi sem talið er að Glerá hafi myndað þegar hún rann undir ís fyrir rúmum 10000 árum.  Við skoðuðum þar hundaþúfur sem margir halda að verði til þegar hundar gera stykkin sín á víðavangi.  Nú vita nemendur betur!  Síðan var gengið sem leið lá upp í Lögmannshlíðarkirkju þar sem Pétur Björgvin, djákni í Glerárkirkju, tók á móti okkur og fræddi um sögu staðarins.  Hann bauð okkur inn í kirkjuna og sýndi okkur gamla gripi, þ.á.m. yfir 400 ára gamla altarisbrík og rúmlega 200 ára gamlan predikunarstól.  Nesti var snætt við kirkjuna og garðurinn skoðaður.  Hafði Pétur orð á því að sjaldan hafi hann hitt jafn prúðan hóp. Gulli fræddi okkur þar um helstu örnefni fjallahringsins með sérstakri áherslu á Hlíðarfjall.  Nú vita nemendur að stóra skálin norðan við skíðasvæðið er ýmist kölluð Hrappsstaðaskál eða Hrafnsstaðaskál. Síðan var gengið norður Lögmannshlíð, gróður skoðaður og stansað við skógræktarreit Síðuskóla.  Neðst í hlíðinni var farið í leiki og því næst haldið heim í skólann.  Þar tóku nemendur þátt í keppni um titilinn Náttúrufræðingur Síðuskóla.  Er skemmst frá því að segja að nemendur í 9. bekk stóðu sig með stakri prýði.  Í öðru sæti var Sæbjörn og Elín Erla er Náttúrufræðingur skólans.  Má nærri geta hvort kennararnir eru ekki að rifna úr stolti!  Myndir má finna hér .