Velkomin í Síðuskóla

Allir nemendur og starfsmenn skólans komu saman á sal í morgun þar sem úrslit keppninnar um sæmdarheitið náttúrufræðingur Síðuskóla voru tilkynnt. Keppnin fólst í því að nemendur áttu að greina 15 myndir sem birtust á tjaldi ein og ein í senn, 5 af fuglum, 5 af plöntum og 5 landslagsmyndir af þekktum stöðum á Íslandi. Guðrún Baldvinsdóttir nemandi í 10. bekk gerði sér lítið fyrir og sigraði keppnina annað árið í röð. Í 2. -3. sæti voru jöfn þau Kjartan Atli Ísleifsson 8. bekk og Fanney Rún Stefánsdóttir 4. bekk en fast á hæla þeirra í 4. sæti varð Sóley Gunnarsdóttir nemandi í 2. bekk. Þau fengu öll viðurkenningarspjald frá skólanum og mikið klapp frá skólasystkinum. Þetta var hin ánægjulegast stund þar sem endað var á því að syngja skólasönginn.
Við óskum þeim öllum hjartanlega til hamingju með mjög góðan árangur  þar sem keppnin er ekki auðveld og sömu myndir eru lagðar fyrir alla nemendur. Þeir fuglar sem bera þurfti kennsl á voru snæugla, steindepill, þúfutittlingur, langvía (hringvía) og lóuþræll. Plönturnar voru jakobsfífill, holurt, hrútaberjalyng, hrafnafífa og týsfjóla. Landslagsmyndirnar voru af Eldey, Sauðárkróki, Glym, Hvannadalshnjúk og Mývatni.

Leitin að grenndargralinu hefst mánudaginn 6. september. Þetta er í þriðja skipti sem nemendur í 8.-10. bekk hefja leit að hinu eftirsóknaverða grali. Hugmyndin að verkefninu fæddist í Giljaskóla sumarið 2008 og um haustið hófu nemendur skólans leit að grenndargralinu í fyrsta skipti. Árið 2009 tók Síðuskóli þátt og nú hefur Glerárskóli bæst í hópinn. Bjóðum við nemendur Glerárskóla velkomna til leiks.

Þrautir verða settar upp á vissum stað í skólunum þremur eins og tíðkast hefur. Þær koma upp eftir hádegi á mánudögum. Heimasíða  Leitarinnar hefur verið tekin í notkun en þar má jafnframt nálgast þrautirnar og annað sem þeim tilheyrir auk almennra upplýsinga um verkefnið. Slóðin er www.grenndargral.is.

Framundan eru 10 vikur fullar af spennandi viðfangsefnum og ljóst að keppnin harðnar með hverju árinu. Við viljum hvetja foreldra og aðra sem koma að uppeldi þeirra sem taka þátt í Leitinni til að aðstoða þau við úrvinnslu þrautanna. Leitin er góður vettvangur fyrir fjölskylduna að koma saman og vinna að sameiginlegu verkefni þar sem allir geta fundið eitthvað við sitt hæfi. Allir geta tekið þátt.

Umsjónarmenn verkefnisins eru Brynjar Karl Óttarsson kennari í Giljaskóla, Helga Halldórsdóttir kennari í Glerárskóla og Sigrún Sigurðardóttir kennari í Síðuskóla.

Um helgina var haldið Norðurlandamót 19 ára og yngri í frjálsum íþróttum hér á Akureyri. Einn keppendanna var Kolbeinn Höður Gunnarsson nemandi í 10. bekk Síðuskóla. Hann keppti í 100 og 200 metra hlaupi og var í boðhlaupssveitum Íslands í  4 x 100 m og 4 x 400 m hlaupum. Kolbeinn náði mjög góðum árangri en flestir keppinauta hans voru þremur til fjórum árum eldri en hann. Við óskum Kolbeini til hamingju með góðan árangur og velgengni í framtíðinni á hlaupabrautinni. Hægt er að skoða úrslit mótsins á heimasíðu Frjálsíþróttasambands Íslands www.fri.is

Matseðill fyrir ágúst og september er kominn inn.

Hann má nálgast hér.

Íþróttir
Fyrstu þrjár vikur haustannar verðum við úti með íþróttatímana. Nemendur koma þá klæddir eftir veðri  í fötum sem henta til  íþróttaiðkunnar.  
Nemendur skulu fara í sturtu eftir íþróttatíma.
Geti nemandi ekki tekið þátt í tíma skulu forföll  tilkynnast á skrifstofu skólans. 
Gleymi nemandi íþróttafötum/handklæði er í boði að fá lánuð föt einu sinni á hvorri önn.

Sund
Nemendur mæta með sundföt og handklæði í sundtíma.
Ef sundföt gleymast  heima er hægt að fá lánuð sundföt einu sinni á hvorri önn.  
Nemendur mega koma með sundgleraugu en slík verða ekki til láns í sundlauginni. 
Geti nemandi ekki tekið þátt í tíma skulu forföll  tilkynnast á skrifstofu skólans. 

Ágætu foreldrar / forráðamenn nemenda í Síðuskóla

Senn fer nýtt skólaár að hefjast og eins verið hefur síðast liðin ár munu umsjónarkennarar byrja á viðtölum við nemendur og foreldra dagana 23. og 24. ágúst. Boð um viðtalið verður sent á rafrænu formi í vikunni áður.
Nú munum við í fyrsta skipti óska eftir því að undirbúningur fyrir viðtölin fari fram í gegnum leiðsagnarmatið í Mentor. Opnað verður fyrir matið þann 17. ágúst en hér aftar í bréfinu má finna leiðbeiningar um gerð þess.
Varðandi aðgang að Mentor þá er hægt að sækja hann inn á síðunni mentor.is með því að velja Gleymt lykilorð vinstra megin á síðunni. Þá opnast gluggi þar sem  kennitala er skráð og í framhaldi af því sendir Mentor tölvupóst (mikilvægt er að rétt netfang sé skráð inn á vefinn) þar sem boðið er upp á að búa til lykilorð en notendanafnið er alltaf kennitala.
Námsgagnalistar fyrir komandi skólaár má nálgast á heimasíðu skólans siduskoli.is
Við hlökkum til að eiga farsælt og gefandi samstarf við ykkur á komandi skólaári eins og undanfarin ár. 

                                                                Bestu kveðjur,
                                                            stjórnendur Síðuskóla

Leiðbeiningar inn á leiðsagnarmatið