ÍSAT

Á dögunum tók lið frá Síðuskóla þátt í Skólahreysti  og stóðu keppendur sig mjög vel og lentu í þriðja sæti. Þau sem tóku þátt voru Auður Kristín Pétursdóttir, Helena Rut Pétursdóttir og Einar Aron Fjalarsson sem öll eru í 9. bekk B og svo Daril Suson Balo sem er í 10. bekk.  Auður Kristín náði þeim frábæra árangri að ná öðrum besta tíma í hreystigreip sem náðst hefur í keppninni til þessa. Þetta eru frábærir krakkar og við hyggjum gott til næstu keppni þegar þrjú þeirra verða komin í 10. bekk. Hér eru nokkrar myndir sem Fjalar Fjölnisson tók.

Næsta þriðjudag, 5. apríl, er útvistardagur Síðuskóla og höldum við þá uppí Hlíðarfjall. Farið verður af stað milli 8:30 og 9:00 og komum heim milli 12:15 og 12:45. Matur verður í mötuneyti fyrir þá sem eru skráðir þegar heim er komið. Nemendur í 1. - 3. bekk eiga ekki kost á því að fá lánaðan búnað en geta komið með sinn eiginn og þeir sem ekki eiga skíði geta komið með sleða eða þess háttar en allir eiga að sjálfsögðu að vera með hjálma. Nemendur í 4. - 10. bekk geta fengið lánaðan búnað og hefur mæling farið fram á skó­stærðum í skólanum undanfarna daga. Ef einhverjir hafa misst af þessum mælingum og þurfa búnað reynum við að útvega þeim hann. Nemendur í 6. - 10. bekk geta fengið að vera lengur uppí fjalli þ.e. eftir að rútur fara heim en til þess þurfa þeir að koma með skriflegt leyfi frá foreldrum/aðstandendum og eru þá ekki lengur á ábyrgð skólans. Gott er að nesta sig vel fyrir daginn, frjálst nesti en ekki leyfilegt að hafa sælgæti eða gosdrykki. Hvetjum alla til að klæða sig eftir veðri og hafa í huga að kaldara getur verið uppí fjalli heldur en í bænum. Enginn aukakostnaður fylgir þessum degi. Nemendum  stendur til boða að fara á svigskíði, snjóbretti, gönguskíði, sleða eða í gönguferð um svæðið. ALLIR NEMENDUR SKULU VERA MEÐ HJÁLMA. Hér má sjá myndir frá síðasta útivistardegi í mars 2010. Íþróttakennarar

Yngispiltadagurinn 2011 var haldinn hátíðlegur í 9.B, 25. mars s.l.   Stúlkurnar í bekknum bökuðu girnilegar kökur handa drengjunum sem þáðu þær með þökkum enda alltaf pláss fyrir gómsætar kökur hjá hungruðum piltum.   Þetta er þriðja árið í röð sem bekkurinn heldur upp á yngispiltadaginn og finnst nemendum það skemmtileg tilbreyting. Yngispiltadagurinn er fyrsti dagur Einmánaðar í hinu forna tímatali.   Stúlkurnar bíða núna spenntar eftir því hvað gerist í byrjun Hörpu. Fleiri myndir hér.

Uppskeruhátíð Stóru upplestrarkeppninnar var haldin í Kvosinni, sal Menntaskólans á Akureyri í gær miðvikudaginn 23. mars. Keppendur voru 17 frá grunnskólunum á Akureyri auk fulltrúa frá Hrísey og Grímsey og hafa aldrei verið fleiri. Fulltrúar Síðuskóla voru Kristrún Jóhannesdóttir og Ósk Tryggvadóttir. Varamaður þeirra var Oddur Pálsson. Uppskeruhátíðin tókst í alla staði vel og var hátíðleg stund. Ávörp voru flutt og nemendur Tónlistarskólans, sem eru í 7. bekk, fluttu nokkur tónlistaratriði.  Nemendur okkar stóðu sig með mikilli prýði og erum við afar stolt af þeim. Úrslit keppninnar urðu þau að Fannar Már Jóhannsson úr Lundarskóla hlaut 1. sæti, Kristrún Jóhannesdóttir úr Síðuskóla varð í 2. sæti og Urður Andradóttir úr Lundarskóla varð í 3. sæti. Hér má sjá myndir frá uppskeruhátíðinni.

Föstudaginn 18. mars er furðufatadagur í skólanum. Allir, nemendur sem starfsmenn, eru hvattir til að koma öðruvísi klæddir og hjálpast þannig að við að gera daginn skemmtilegri.

7. bekkur hefur verið að vinna með líkama mannsins undanfarið í einstaklings- og hópavinnu. Nemendum var skipt í mismunandi hópa og þurfti hver hópur að kynna sitt verkefni fyrir bekknum í lokin. Afrakstur þeirrar vinnu má sjá hér.