Í gær fór Skólahreysti fram í Höllinni og stóð okkar lið sig sérlega vel og lenti í 2. sæti. Virkilega góður árangur og enn möguleiki að komast áfram í lokakeppnina sem fer fram í Reykjavík 23. maí.
Og hrós til allra stuðningsmanna Síðuskóla, þeir studdu vel við sitt fólk í gærkvöldi einsog sjá má á myndum.
Hér má sjá myndir frá æsispennandi kvöldi.
Strákarnir í 9. bekk fengu skemmtilega heimsókn í vikunni þegar Atli Dagur, hjúkrunarfræðingur á bráðamóttöku Landspítalans, kynnti fjölbreytt störf í hjúkrun. Markmiðið var að sýna að hjúkrun er spennandi starf sem hentar öllum kynjum. Settar voru upp stöðvar þar sem strákarnir fengu að spreyta sig á raunverulegum verkefnum. Þeir prófuðu meðal annars hjartahnoð og heimlich til að losa aðskotahlut úr öndunarvegi. Kynningin var áhugaverð og strákarnir áhugasamir eins og sjá má á myndum frá heimsókninni.
Hér má sjá fleiri myndir frá heimsókninni.
Síðustu dagar vetrar voru vel nýttir í Síðuskóla. Á þriðjudag og miðvikudag voru þemadagar þar sem hefðbundin stundaskrá var lögð til hliðar og nemendur unnu að ýmsum skemmtilegum verkefnum á stigunum. Yngsta stig vann með sögur Astrid Lindgren á fjölbreyttan hátt, bjuggu til húsið hennar Línu langsokks og allar helstu persónur sögunnar, settu upp Matthíasarskóg og Helvítisgjána úr Ronju ræningjadóttur og bjuggu til boga, örvar og rassálfa. Miðstigið undirbjó Barnamenningarhátíð en setti einnig upp heilan regnskóg á B-gangi ásamt því að kynna sér hinar ýmsu dýrategundir. Unglingastigið lagði áherslu á heilsu, heilbrigði og útiveru. Þau unnu verkefni, spiluðu ýmis spil, kepptu á blakmóti unglingastigs og hresstu upp á útisvæði skólans svo eitthvað sé nefnt. Virkilega skemmtilegir dagar þar sem sköpunargleðin réð ríkjum.
Hér má sjá fleiri myndir frá þemadögum.
Sjálf Barnamenningarhátíð miðstigs fór svo fram milli kl. 14 og 16 á miðvikudaginn. Þar sýndu nemendur listaverk og muni sem þeir hafa verið að vinna að í vetur auk þess sem sýnd voru dans- og tónlistaratriði sem nemendur höfðu æft og undirbúið fyrir hátíðina. Nemendur seldu einnig gestum bakkelsi og límonaði sem þeir höfðu gert sjálfir. Ágóðinn af kaffisölunni fer í að gleðja okkar góðu nágranna á Lögmannshlíð. Barnamenningarhátíð var vel sótt og þökkum við gestum kærlega fyrir komuna.
Í næstu viku, miðvikudaginn 29. apríl, fer fram Norðurlandsriðill Skólahreysti. Í dag mættu nemendur og starfsfólk í íþróttasal skólans þar sem Skólahreystiliðið var kynnt. Í liðinu eru þau Elías Haukur, Halla, Kári og Sóldís sem öll eru nemendur í 10. bekk. Nokkrir nemendur skólans fengu að keppa við liðið í Skólahreystisþrautum.
Hér má sjá fleiri myndir frá því í morgun.
Upptakturinn fór fram í Hofi í gær þar sem flutt voru frumsaminn tónverk eftir sjö ungmenni úr grunnskólum bæjarins. Síðuskóla átti einn fulttrúa á þessum viðburði og erum við afar stolt af henni Ólöfu Birnu sem átti verkið "Árstíðirnar". Verkin voru flutt af atvinnu tónlistarfólki og höfðu ungmennin unnið að útsetningu og þróun verkanna undanfarnar vikur í samstarfi við þau.
Við óskum þeim öllu til hamingju með vel heppnaða tónleika, framtíðin er björt hjá tónlistarlífi Akureyrar.
Nemendur á miðstigi eru þessa dagana að undirbúa þátttöku sína í Barnamenningarhátíðinni á Akureyri sem haldin er dagana 1.–27. apríl. Þetta er í þriðja sinn sem nemendur Síðuskóla taka formlega þátt í hátíðinni.
Miðvikudaginn 22. apríl verður Barnamenningarhátíð í Síðuskóla milli kl. 14:00 og 16:00.
Dagskrá hátíðarinnar:
· Listasýning: Sýning á verkum nemenda á miðstigi. Þar fá nemendur að sýna sköpun sína og vinna með fjölbreytt efni og miðla.
· Skemmtiatriði á sviði: Nemendur sýna hæfileika sína í söng, leiklist, dansi eða annars konar sviðslistum.
· Sköpunarsmiðja: Opið rými þar sem allir eru velkomnir til að vinna saman að skapandi verkefnum. Í sameiginlegri listsköpun fá þátttakendur tækifæri til að kynnast hvort öðru á nýjan hátt, deila hugmyndum og upplifa gleði sköpunarinnar saman.
· Kaffihús: Kaffihúsið verður rekið af nemendum sem hluti af viðburðinum.
Markmið Barnamenningarhátíðarinnar er að hvetja börn og ungmenni til virkrar þátttöku í menningarstarfi og efla sköpunarkraft þeirra. Síðuskóli er stoltur þátttakandi í þessu mikilvæga framtaki og hvetur alla til að mæta.
Hæfileikakeppni Akureyrar er árlegur viðburður fyrir börn í 5. - 10. bekk. Um að ræða fjölbreytta keppni þar sem börn og unglingar á Akureyri geta komið sér á framfæri og unnið með styrkleika sína og hæfileika. Dæmi um atriði sem gætu skráð sig til leiks geta verið á sviði sönglistar, leiklistar, danslistar, töfrabragða og hljóðlistar svo eitthvað sé nefnt. Atriðin geta verið einstaklingsatriði, paraatriði eða hópatriði.
Hægt að skrá sig til leiks til 14. apríl. Skráningarhlekkur HÉR!
Frekari upplýsingar veita hulda.osk.jonsdottir@akureyri.is
Nánari upplýsingar:
Dagsetning: 22. apríl
Tímasetning: 16.00-18.00
Staðsetning: Hof
Aðgangseyrir: Enginn aðgangseyrir
Í vetur hafa nemendur á miðstigi Síðuskóla og Lundarskóla komið í endurteknar heimsóknir í Listasafnið, fengið þar fræðslu og í framhaldinu unnið verkefni í tengslum við heimsóknirnar.
Afraksturinn má sjá á sérstakri sýningu nú stendur yfir í safnfræðslurými Listasafnsins, sem opið er öllum gestum safnsins, frítt fyrir 18 ára og yngri.
Sýningin er lokahnykkur í samstarfi verkefnastjóra fræðslu og miðlunar í Listasafninu á Akureyri og myndmenntakennara Síðuskóla og Lundarskóla.
Síðuskóli tók þátt í stærstu sögustund ársins þegar glæný saga Hjalta Halldórssonar - Hetja dagsins - var frumflutt á Rás 1 í morgun. Sagan var í senn skemmtileg og spennandi einsog góðar sögur eiga að vera. Það er barnamenningarfélagið Ibby sem stendur að útgáfu sögunnar og hefur gert undanfarin nokkur ár í tilefni þessa dags. Smásagan er ætluð grunnskólabörnum á öllum aldri og er verkefnið hluti af þeirri hugsjón IBBY að lestraráhugi og lestrarfærni náist fyrst og fremst með því að færa ungum lesendum vandaðar og spennandi sögur. Hjalti Halldórsson hefur getið sér gott orð fyrir skemmtilegar barna- og unglingabækur og eru þær allar til á skólabókasafni Síðuskóla ef áhugi er að lesa fleiri sögur eftir hann.
Einsog sjá má á þessum myndum var hlustað í flestum stofum í morgun og áttu nemendur mjög notalega stund saman.
Takk fyrir okkur.
Dagana 16.-25. mars var unnið með orðaforða í öllum árgöngum skólans. Verkefnið er liður í læsisverkefnum skólans og var núna ákveðið að beina spjótum að orðum, alls kyns orðum sem lið í því að auka orðaforða og vinna með orðskilning. Afurðin voru orðarenningar með alls kyns orðum og orðskýringum. Mikil ánægja var með verkefnið og má skoða öll skrítnu, skemmtilegu og forvitnilegu orðin í matsalnum, sjá hér.
Bugðusíða | 603 Akureyri
Sími á skrifstofu: 462-2588
Netfang: siduskoli@akmennt.is
Símanúmer Frístundar: 461-3473
Skrifstofa skólans er opin frá
kl. 07:45 - 16:00
