ÍSAT

Í gær fékk 3. bekkur skólans góða heimsókn er fulltrúar frá slökkviliði Akureyrar komu og veittu nemanda í bekknum verðlaun vegna 112 dagsins. 112 dagurinn er haldinn 11. febrúar á hverju ári þar sem lögð er áhersla á kenna neyðarnúmerið og minna á mikilvægi kunnáttu í skyndihjálp. Fulltrúar frá slökkviliðinu komu í heimsókn fyrr í mánuðinum og lögðu fyrir getraun í 3. bekk eins og gert er í þessum árgangi á öllu landinu og síðan er dregið úr réttum svörum. Nemandinn sem svaraði öllu rétt og dreginn var út er Tinna Ósk Pálsdóttir og óskum við henni til hamingju! Á myndinn með fréttinni má sjá þegar fulltrúar frá slökkviliðinu komu og afhentu Tinnu viðurkenningarskjal en hún fékk að auki inneign á Storytel hljóðbókasafnið.

Undanfarnar tvær vikur hefur 100 miða leikurinn verið í gangi í skólanum. Leikurinn virkar þannig að á hverjum degi fá 5 starfsmenn úthlutuðum alls 10 hrósmiðum sem þeir láta nemendur fá sem sýnt hafa góða hegðun þann daginn. Eftir skráningu hjá ritara, þar sem nemendur draga númer, eru miðarnir hengdir á töflu á ganginum yfir það númer sem dregið hafði verið. Í lokin eru 10 nemendur dregnir út og fá verðlaun hjá skólastjórnendum sem tilkynnt er á úrslitunum hver eru. Í ár var röðin 61-70 valin og í henni voru eftirfarandi nemendur: Natalía Ösp í 6. bekk, Kristín Lilly í 2. bekk, Annabel í 8. bekk, Birna Dís í 4. bekk, Anton Már og Jón Orri í 5. bekk, Dagbjört Lilja í 9. bekk, Lilja Sól í 1. bekk, Logi Hrafn í 10. bekk og Silja Ösp í 7. bekk. Við óskum þessum nemendum innilega til hamingju. Úrslitin voru tilkynnt í gær, en vegna fjöldatakmarkana var eingungis einn bekkur á sal en hinir fylgdust með gegnum fjarfundabúnað. Nemendur fóru í umbunina í dag, sem var að fara í pílu í íþróttahúsinu í Laugargötu og kaffi í Bakaríinu í Sunnuhlíð. Myndir frá því þegar úrslitin voru tilkynnt í gær og ferðinni í morgun má sjá hér.

Í vetur hefur verið boðið upp á val á miðstigi. Í gær byrjaði lota 4 og þær  valgreinar sem eru í boði eru píla, skólablað Síðuskóla, stopmotion myndbandagerð, origami og teikning, tónlistarstefnur, íþróttir, bókagerð og lestur og útsaumur. 

Markmið verkefnisins eru m.a. að stuðla að auknum samskiptum á milli árganga, efla áhuga og gefa nemendum kost á að velja sér viðfangsefni og auka þannig lýðræði í skólastarfi.

Hér má sjá myndir úr pílunni. 

Nemendur í  9. bekk fengu það verkefni í smiðjum að stofna eigið eigið fyrirtæki og áttu meðal annars að huga að vörum, markhóp og markaðssetningu (slagorð, auglýsingar o.s.frv.). Neó, Sara Sif, Máni og Íris Embla stofnuðu pítsastað. Þau settu upp flotta heimasíðu og bjuggu einnig til Facebook og Instagram aðgang til að auglýsa fyrirtækið sitt enn betur. Meðfylgjandi er hlekkur á heimasíðuna La Crosta (skorpa á ítölsku). Hér er að finna heimasíðu fyrirtækisins. 

Kennsla hefst í Síðuskóla á morgun, þriðjudaginn 4. janúar, kl. 8.10. Í dag hefur starfsfólk unnið að skipulagningu skólastarfs næstu daga. 

Við þökkum ykkur fyrir samstarfið á liðnu ári og megi nýtt ár verða okkur öllum gott.