Fréttir

Við munum verða með einn söludag í viðbót á Síðuskólapeysunum. Nemendur 10. bekkjar eru að safna fyrir skólaferðalagi vorið 2013 og mun allur ágóði af peysusölunni renna í ferðasjóð þeirra. Peysurnar verða seldar  fimmtudaginn 1. nóv frá 17:00- 19:00 á kaffistofu starfsmanna í ritararýminu (gengið inn um íþróttahúsið).  Peysurnar kosta kr. 5500 og einungis er hægt að borga með peningum. Ef keyptar eru tvær eða fleiri peysur þá kostar peysan kr. 5000. Peysur þarf að greiða við pöntun. Peysurnar hlaupa um ½ númer við fyrsta þvott mjög gott að þvo þær á röngunni. Kær kveðja Nemendur og foreldrafulltrúar í 10. bekk Síðuskóla

Hettupeysurnar eru á leiðinni norður.  Þær verða afhentar föstudaginn 19. okt í matsal Síðuskóla á milli 15:00-16:00. Foreldrar og nemendur í 10. bekk. 

Nú er þemadögum lokið og var dagurinn í dag ekki síður skemmtilegur en dagurinn í gær. Haldið var áfram að syngja, dansa, útbúa veggmyndir, leika leikrit og búa til hina ýmsu töfraheima.  Nemendur og starfsfólk eiga hrós skilið fyrir frábæra daga og hér má sjá myndir frá öllu fjörinu.

Þemadagar í Síðuskóla 16. og 17. október  Í dag var mikið fjör hjá okkur hér í skólanum. Allir nemendur og starfsfólk skólans hafa verið að vinna að Disney þema og má segja að skólinn okkar hafi breyst í nýja undraheima. Nemendur bjuggu til leikrit, bökuðu, elduðu, sömdu leikrit, bjuggu til Neðansjávarheim og Frumskógarheim.  Frábær dagur í alla staði eins og sjá má á eftirfarandi myndum.

Í dag var haldinn SMT dagur í Síðuskóla. Þá leggjum við áherslu á einkunnarorð skólans með allskonar óhefðbundinni vinnu. Kl. 10 fóru allir út til að faðma skólann og bjuggum við til hring sem hvergi slitnaði. Nemendur og starfsfólk sýna þannig að með sameiginlegu átaki er ýmislegt hægt. Sjá myndir hér.

Unglingar frá Akureyri taka þátt í Landsmóti Samfés. Landsmót Samfés hefst á Ísafirði á föstudaginn 5. október og stendur í 3 daga. Frá Akureyri fara fulltrúar úr öllum skólum alls 36 ungmenni sem öll starfa í félagsmiðstöðva-ráðum og sækja valgreinina félagsmálafræði á vegum félagsmiðstöðvanna. Von er á um 400 unglingum á aldrinum 13-16 ára frá félagsmiðstöðvum víðsvegar af landinu. Dagskrá landsmótsins er fjölbreytt. Mótið hefst á kosningu í ungmennaráð Samfés sem er eina ungmennaráðið sem starfar á landsvísu með lýðræðislega kjörna fulltrúa alls staðar að af landinu. Tveir fulltrúar sitja í ráðinu frá Norðurlandi hverju sinni. Styrmir Elí Ingólfsson frá Akureyri er sitjandi fulltrúi í ráðinu og kosinn verður annar fulltrúi frá Norðurlandi á Ísafirði. Þau Hrafnhildur Lára Hrafnsdóttir og Ólafur Hrafn Kjartansson hafa boðið sig fram í það sæti fyrir hönd Akureyrar. Tilgangur ungmennaráðs er m.a. að ungmenni öðlist rödd í samfélaginu, auka jafningjafræðslu og hafa áhrif á viðburði á vegum Samfés. Á laugardag taka unglingarnir þátt í hinum ýmsu smiðjum sem m.a. tengjast útivist, matseld, handverki og fjölmiðlum svo fátt eitt sé nefnt. Dagurinn endar á hátíðarkvöldverði og balli á Bolungarvík. Landsmótinu líkur á sunnudag með Landsþingi ungs fólks sem ungmennaráðið skipuleggur og stýrir. Þar munu landsmótsgestir ræða ýmis mál sem brenna á ungu fólki. Samfés, samtök félagsmiðstöðva á Íslandi standa fyrir fjölda viðburða fyrir félagsmiðstöðvar og unglinga ásamt því að sinna fjölmörgum öðrum verkefnum. Aðalmarkmið Samfés er að stuðla að aukinni félags- og lýðræðisþátttöku ungs fólks á Íslandi. 

Fimmtudaginn 27. september voru allir nemendur Síðuskóla kallaðir saman á sal til að fagna úrslitum í Náttúrufræðingi skólans 2012. Ár hvert höldum við keppni um það, hver hlýtur heiðursnafnbótina Náttúrufræðingur Síðuskóla þar sem allir nemendur skólans spreyta sig á myndum úr náttúru Íslands.   Keppnin felst í að greina 5 myndir af fuglum, 5 myndir af plöntum og 5 landslagsmyndir frá Íslandi. Í ár voru það 5 strákar sem lentu í efstu sætunum. Í 2. -4. sæti urðu Ásbjörn Guðlaugsson 5. KH, Kjartan Arnar Guðmundsson 6. HB, Haukur Brynjarsson 7. SEB og Ingólfur Bjarni Svafarsson 10. bekk. Náttúrufræðingur Síðuskóla 2012 er Kristján Rúnar Kristjánsson 7. HL.   Til hamingjustrákar með góðan árangur!

Síðuskóli er í Comeniusarsamstarfi við skóla í Englandi, Þýskalandi, Frakklandi og á Spáni og komu kennarar og nemendur þessara skóla í heimsókn hingað í síðustu viku. Unnið var með þemað ,,sjálfbær borg"  Nemendur unnu að því í vikunni að hanna borg sem væri sem mest sjálfbær og skipulögðu þeir borgina með hliðsjón af stjórnmálum, mannvirkjum, orku­málum, samgöngum, skólamálum og fleiru sem þeir töldu að sjálfbær borg ætti að hafa yfir að ráða. Nemendur og kennarar gerðu sér margt til dægrarstyttingar og fóru þeir bæði í innanbæjartúr um söfn - Minjasafnið og Iðnaðarsafnið og skoðuðu áhugaverða staði - Lögmannshlíðarkirkja og Jólahúsið ásamt því að fara í heimsókn til bæjarstjórans. Einnig var farin dagsferð með íslenskum nemendum í Mývatns­sveit þar sem farið var á hestbak, í Dimmuborgir, Kröflu og jarðböðin. Á fimmtudegi og föstudegi 27. og 28. sept voru gestirnir kvaddir með tárum.