ÍSAT

Í dag fengu krakkarnir í 3. bekk góða heimsókn en Maron frá slökkviliðinu kom til okkar. Hann Snorri Karl Steinarsson í 3. bekk var dreginn út í árlegri eldvarnargetraun Landssambands slökkviliðs- og sjúkraflutningsmanna. Hann var að vonum glaður með vinninginn og óskum við honum kærlega til hamingju. 

Hér má sjá nokkrar myndir frá heimsókninni.

Í morgun var söngsalur með óhefðbundnu sniði hjá okkur. Þar sem enn eru í gildi takmarkanir sem ná til viðburða þar sem fleiri en 50 manns koma saman var ákveðið að senda sönginn út í stofurnar með fjarfundasniði. Ívar Helgason kom og spilaði undir á sal, þar sem enginn nemandi var. Þess í stað var myndavél sem sendi mynd og hljóð í alla árganga. Tilraunin heppnaðist mjög vel og voru allir ánægðir að fá að syngja, þó flestir hlakki til að geta safnast saman á sal skólans og sungið með öllum nemendum og starfsfólki þegar takmarkanirnar verða að baki. Hér má sjá myndir frá söngsalnum í morgun.

Starfsfólk Síðuskóla óskar nemendum og fjölskyldum þeirra gleðilegra páska og vonum við að páskaleyfið verði ánægjulegt. 
Kennsla hefst að loknu páskafríi þriðjudaginn 14. apríl, skólastarfið verður með svipuðu sniði og síðustu daga. 

Við hvetjum alla til að taka þátt í lestrarátakinu Tími til að lesa. Hér er hægt að sjá nánari upplýsingar um það. Þetta er einfalt: Því meira sem við lesum því betra.

Nú þegar skóladagur er skertur og skákkennsla í skólum liggur niðri hefur Skákfélag Akureyrar, í samstarfi við Skáksamband Íslands ákveðið að blása til netskákmóta fyrir grunnskólanemendur á Norðurlandi eystra. Mótin verða alla fimmtudaga og hefjast klukkan 16:30 og standa í klukkustund.  Hér má sjá nánari leiðbeiningar um mótið og hvernig hægt er að skrá sig.

Ágætu foreldrar

Í ljósi nýjustu tilmæla Almannavarna þarf að endurskoða skipulag skólastarfs frá og með þriðjudeginum 24. mars. Sóttvarnir eru forgangsmál hjá öllum í samfélaginu og eiga þær við allsstaðar og alltaf. Hólfun skóla verður enn markvissari en verið hefur og tekið verður fyrir allan ónauðsynlegan samgang á milli þeirra hvort sem um nemendur eða starfsfólk er að ræða.

Nú er okkur gert að fækka í hópum eldri nemenda og skólar munu því vinna samkvæmt því sem hér segir:

-        1.-4. bekkur verður áfram fram til hádegis í skólanum skv. sama skipulagi og verið hefur

-        5.-7. bekk verður skipt í tvo hópa og mæta nemendur annan hvern dag samkvæmt nánara skipulagi sem ykkur berst frá hverjum skóla.

-        8.-10. bekkur verður alfarið í heima- og sjálfsnámi með aðstoð kennara

Eindregin tilmæli eru um að þeir foreldrar sem eru heima yfir daginn og geta haft börn sín heima geri það. Það styrkir enn frekar sóttvarnir og auðveldar starfsfólki að halda uppi reglubundnu starfi.

Bestu þakkir fyrir ríkan skilning á stöðunni og það er gott að finna hvernig samtakamátturinn fleytir okkur áfram við aðstæður sem þessar.

Karl Frímannsson

sviðsstjóri fræðslusviðs Akureyrarbæjar

Kaffistofum starfsfólks í skólanum hefur verið fjölgað í samkomubanninu. Á einni þeirra voru bakaðar vöfflur til að létta lundina.

Hér má sjá myndir.