ÍSAT

Þriðjudaginn 6. september verður Norræna skólahlaupið í Síðuskóla. Þetta er árviss viðburður þar sem allir nemendur skólans hlaupa eða ganga ákveðna vegalengd. Lengi hefur verið hefð í Síðuskóla að taka tímann og veita þeim sem fljótastir eru viðurkenningu. Að þessu sinni verður breytt til þar sem engin tímataka verður. Nemendur hafa hins vegar val um að hlaupa 1,2, eða 4 hringi en hringurinn er tæplega tveir og hálfur kílómetri. Nemendur 1. bekkjar fara þó bara einn hring í fylgd kennara. Hlaupið hefst klukkan 10:25 og nemendur borða hádegismat að hlaupi loknu. Hefðbundinn kennsla hefst svo aftur þegar hlaupi lýkur.  Miðvikudaginn 7. september hefst síðan átakið göngum í skólann. Þá hvetjum við alla til að ganga eða hjóla í skólann í stað þess að þiggja far. Vert er að minna á umferðarlög, 40. grein þar sem nemendum yngri en 7 ára er óheimilt að hjóla í umferðinni nema í fylgd með fullorðnum. Við mælumst til að nemendur í 1. bekk komi gangandi en þeir sem eru í 2. bekk megi koma á hjóli að hausti.

Fyrsti bekkur fór í berjaferð í dag og skemmti sér vel í góðu veðri þó lítið hafi verið af berjum. Þegar heim kom teiknuðu þau fínar myndir af berjum og fingramáluðu á léreft með berjum. Hér má sjá myndir.

Í ágústfréttabréfinu sögðum við frá nýrri aðstöðu sem búið er að setja upp fyrir vestan skólann. Þessi aðstaða nýtist okkur í skólanum mjög vel til útikennslu og útieldunar, og nú þegar hafa kennarar farið með nemendur út á nýja svæðið. Hverfisnefnd Síðuhverfis stóð að framkvæmdinni sem er öll til fyrirmyndar. Hér má sjá nokkrar myndir.

Skólasetning verður í Síðuskóla mánudaginn 22. ágúst. Nemendur í 2. - 5. bekk mæta klukkan 9:00 á sal skólans og nemendur í 6. - 10. bekk klukkan 10:00. Umsjónarkennarar verðandi 1. bekkjar munu hafa samband og boða foreldra og barn í viðtal annað hvort mánudaginn 22. ágúst eða þriðjudaginn 23. ágúst.  Kennsla hefst samkvæmt stundaskrá þriðjudaginn 23. ágúst nema hjá 1. bekk en fyrsti skóladagur þeirra er miðvikudaginn 24. ágúst.

Á dögunum fékk nemandi í 7. bekk Síðuskóla, Ragnheiður Rós Kristjánsdóttir viðurkenningu skólanefndar fyrir að vera góður skólaþegn. Ragnheiður hefur tekið miklum framförum í námi í vetur. Hún er einstaklega kurteis og prúð í allri framkomu og góður félagi. Við í Síðuskóla erum stolt af að hafa Ragnheiði í skólanum okkar og óskum henni innilega til hamingju með þessa viðurkenningu.

Í dag var Síðuskóla slitið, 1. - 9. bekkir mættu á skólaslit í skólanum í morgun og 10. bekkur mætti svo í Glerárkirkju þar sem glæsileg útskriftarathöfn fór fram. Um leið og við óskum 10. bekk innilega til hamingju með útskriftina óskum við öllum gleðilegs sumars og þökkum fyrir samstarfið í vetur.

Síðasti skóladagur vetrarins var í dag og voru nemendur út um allan bæ með starfsfólki við leik og störf á síðari umhverfidegi vorsins. Veðrið lék við alla og heppnaðist dagurinn vel. Í lok dags komu svo allir saman í garðinum þar sem grillaðar voru pylsur. Hér má sjá myndir frá þessum skemmtilega degi. Við minnum svo á skólaslitin á morgun, þau er sem hér segir: Klukkan 9.00  1. - 4. bekkur Klukkan 10.00  5. - 9. bekkur Klukkan 15.00   10. bekkur Nemendur í 1.-9. bekk mæta fyrst á sal og þá mun skólastjórinn kveðja fyrir hönd skólans. Síðan fara nemendur í sínar heimastofur, fá vitnisburðarblöð eftir veturinn og kveðja sína umsjónarkennara. 10. bekkur ásamt aðstandendum og starfsfólk mæta í Glerárkirkju og síðan verður kaffi á eftir í skólanum.

Í dag, 31. maí var Grænfáninn afhentur í Síðuskóla í 6. sinn en við fengum hann fyrst árið 2006. Athöfnin í dag var haldin í íþróttahúsi og var hátíðleg og skemmtileg. Veittar voru viðurkenningar fyrir myndasamkeppni í tengslum við umhverfismál og 4. bekkur sem henti minnstu í keppninni um minnstu matarsóunina fékk viðurkenningu. Þarna voru flutt tónlistaratriði og þrír fulltrúar nemenda í umhverfisnefnd fluttu stutt erindi. Hér má sjá nokkrar myndir frá þessari skemmtilegu athöfn.

Á föstudaginn sl. var söngsalur hjá okkur og úrslit í lestrarkeppninni kynnt í leiðinni. Þar voru veitt verðlaun á hverju stigi og síðan fékk bekkurinn sem las mest, verðlaun. Verðlaunahafarnir voru Bergur í 10. bekk, Halldór Birgir í 7. bekk, Svavar Máni Geislason í 5. bekk og Íris Embla í 3. bekk sem fengu viðurkenningu og 3. bekkur fékk bekkjarverðlaunin, en hann fær ísveislu. Á myndinni með fréttinni má sjá verðlaunahafa fá verðlaunin afhent. Hér má líka sjá fleiri myndir frá verðlaunaafhendingunni og söngsal.