ÍSAT

Dagana 9. -15. apríl dvelja 29 nemendur úr Gilja-, Glerár og Síðuskóla í Aarhus í Danmörku. Þetta eru nemendur sem hafa verið í dönskuvali í vetur. Með í för eru þrír dönskukennarar, þær Kristín List Malmberg  úr Síðuskóla, Sigríður Hreinsdóttir úr Glerárskóla og Steinunn Kristín Bjarnadóttir úr Giljaskóla.  Verkefnið er fjármagnað af Nordplus-Junior.

Í morgun voru afhent verðlaun fyrir hina árlegu lestrarkeppni 4. og 5. bekkjar. Markmiðið með keppninni var að auka leshraða og lesskilning nemenda og að sem flestir nemendur læsu sér til ánægju, þ.e. að þeir lærðu að meta ,,yndislestur“. Tveir nemendur í hverjum bekk fengu bókaverðlaun, þ.e. sá sem las flestar blaðsíður og sá sem sýndi mestar framfarir. Einnig var keppni um það hvor árgangurinn læsi fleiri blaðsíður, en þau verðlaun fóru til 4. bekkjar en alls lásu nemendur rúmar 10 þúsund bls. Nemendur lásu á hverjum degi í skólanum og einnig var lesið af kappi heima. Meðfylgjandi mynd er af 4. bekk, ásamt kennurum sínum, sem vann keppnina um flestar lesnar blaðsíður, en allir stóðu sig vel og sumir sýnda miklar framfarir á þeim tíma sem keppnin tók. 

Alþjóðlegur dagur einhverfunnar er laugardaginn 2. apríl og föstudaginn 1.apríl næstkomandi hvetjum við alla til að klæðast bláu og vekja þannig athygli á málefnum einhverfra barna en blái liturinn hefur fest sig í sessi sem litur einhverfunnar um heim allan. Líkt og undanfarin ár er það BLÁR APRÍL - Styrktarfélag barna með einhverfu, sem stendur fyrir deginum.Markmið bláa dagsins er að vekja athygli á einhverfu og fá landsmenn alla til að sýna einhverfum stuðning sinn. Með aukinni vitund og þekkingu á einhverfu byggjum við upp samfélag sem er betur í stakk búið til að skilja þarfir einhverfra og virða framlag þeirra til samfélagsins. Við hlökkum til að sjá ykkur öll í bláu föstudaginn 1. apríl. Stöndum saman og fögnum fjölbreytileikanum. Því lífið er blátt á mismunandi hátt! 

FOKS ætla að efna til leiks i kjölfar lestarbingós Heimilis og skóla.  Ætlunin er að hvetja alla til að lesa mikið um páskana og taka þátt i leiknum.  Leikurinn er eftirfarandi: Fylla á út blaðið og merkja við þegar lesið er.  Skila þarf inn öllum blöðum til Svövu ritara eftir páskana   Nemendur mega lesa eins mikið og þeir vilja og skila inn eins mörgum blöðum og þeir vilja.    Bingóspjald 1  Bingóspjald 2  Bingóspjald 3  

Miðvikudaginn 16. mars var keppt í Skólahreysti í Íþróttahöllinni á Akureyri. Síðuskóli á titil að verja en skólinn hefur sigrað Akureyrarriðilinn síðustu þrjú ár. Skemmst er frá því segja Síðuskóli vann Akureyrarriðilinn með 47,5 stig sem er glæsilegur árangur. Keppendur voru Ágústa Dröfn Pétursdóttir, Hulda Karen Ingvarsdóttir, Guðni Jóhann Sveinsson og Ragúel Pinó Alexandersson. Varamenn voru Sævar Fylkisson og Embla Dögg Sævarsdóttir. Óskum þessum flottu fulltrúum skólans innilega til hamingju. Myndir: Liðsmyndir, myndir frá keppninni á Akureyri

Næsta fimmtudag verður útivistardagur í Hlíðarfjalli ef veður leyfir. Fylgist með á heimasíðunni ef tvísýnt er með veður þennan morgun. Engin hefðbundin kennsla verður þennan dag og valgreinar verða ekki kenndar eftir hádegi. Mæting er á venjulegum tíma, klukkan 8:00 og fyrsta rúta fer frá skólanum klukkan 8:15. Myndir frá útivistardeginum

Í dag voru nemendur 8. bekkjar með kynningu á hinum ýmsu fyrirtækjum og starfsgreinum. Þeir heimsóttu fyrirtæki og kynntu sér starfsemina og útbjuggu veggspjöld og kynningarbása. Hér má sjá myndir.