Hrekkjavökuball í Síðuskóla 24. október
20.10.2023
Sjoppa á yngsta stigi:
Sjoppa á miðstigi:
Fréttir
Bleiki dagurinn í Síðuskóla
20.10.2023
Hér má sjá myndir frá bleika deginum. Nemendur og starfsmenn voru hvattir til að mæta í bleiku til að sýna samstöðu í baráttunni gegn krabbameini.
Nýtt leiksvæði við Síðuskóla vígt í morgun
18.10.2023
Í morgun var nýtt leiksvæði við Síðuskóla vígt. Fjölmenni var við athöfnina og ásamt nemendum og starfsfólki var fjöldi góðra gesta viðstaddur. Ólöf Inga skólastjóri stýrði dagskránni sem hófst á því að Ásthildur Sturludóttir bæjarstjóri flutti ávarp. Hún talaði til nemenda og óskaði þeim til hamingju um leið og hún bað þá að ganga vel um svæðið svo hægt væri að njóta þess í komandi framtíð. Því næst var skólasöngur Síðuskóla sunginn, forsöngvarar voru nokkrir nemendur úr 6. bekk. Dagskránni lauk á því að Ólöf Inga fékk til sín Evu Wium Elísdóttur fyrrverandi nemanda Síðuskóla. Á sínum tíma var hún dugleg að hvetja til þess að við skólann kæmi körfuboltavöllur. Eva er núna lykilleikmaður í körfuknattleiksliði Þórs og er í A landsliðinu. Það var því við hæfi að fá Evu til að koma og taka formlega fyrstu körfuna á nýja körfuboltavellinum.
Skipulagning skólalóðarinnar er búinn að taka mörg ár og fengu nemendur að koma með tillögur að leiktækjum og var unnið út frá þeim hugmyndum við hönnunina og fengu nemendur nánast allt sem þeir óskuðu sér. Góð samvinna var við hönnuði og starfsfólk Umhverfis- og mannvirkjasviðs og var tekið tillit til óska og samvinnan frábær í alla staði. Einnig má nefna að stjórn foreldra- og kennarafélags Síðuskóla FOKS, var mjög dugleg við að aðstoða við alla hugmyndavinnu og framkvæmd. Þetta samvinnuverkefni er til fyrirmyndar og útkoman eins og best verður á kosið.
Hér má sjá myndir frá því í morgun.
Símalausar vikur
17.10.2023
Á fundi í skólaráði þann 4. október sl. var ákveðið að hafa þrjár símalausar vikur fyrir áramót og gera í framhaldi af því könnun á hvernig til tókst. Símalausar vikur eru 16.-20. október, 13.-17. nóvember og 4.-8. desember.
Vígsla skólalóðar
16.10.2023
Komin er ný og flott skólalóð við skólann okkar. Á miðvikudaginn, þann 18. október kl. 10.30 verður athöfn úti á lóð þar sem nýja svæðið verður formlega vígt. Við munum hittast fyrst úti og síðan fá nemendur grillaðar pylsur og ís í tilefni dagsins. Það eru allir velkomnir að koma og gleðjast með okkur.
Bleikur dagur föstudaginn 20. október
16.10.2023
Föstudaginn 20. október er bleikur dagur hjá nemendum og starfsfólki. Það er orðinn fastur liður hjá okkur hér í skólanum að halda upp á þennan dag, klæðast bleiku og sýna þannig samstöðu í baráttunni gegn krabbameini. Við hvetjum að sjálfsögðu alla til að vera með. 
Fyrsti snjórinn
12.10.2023
Það var fjör í morgun í frímínútum þegar nemendur fóru út í fyrsta snjó vetrarins á skólalóðinni. Margir nýttu tækifærið og gerðu hina myndarlegustu snjókarla. Hér má sjá nokkrar myndir sem teknar voru úti í frímínútum í morgun.
Skipulagsdagur og foreldraviðtöl næstu daga
04.10.2023
Við í skólanum minnum á skipulagið næstu daga. Á morgun er skipulagsdagur í skólanum og því enginn skóli hjá nemendum. Á mánudag og þriðjudag eru svo foreldraviðtöl.
Farsæld barna
26.09.2023
Kæru foreldrar / forráðamenn leik- og grunnskólanemenda á Akureyri
Eins og mörgum er kunnugt, þá stendur yfir innleiðing laga um samþætta þjónustu í þágu farsældar barna, sem í daglegu tali eru kölluð farsældarlögin. Nú er kominn nýr og aðgengilegur vefur sem kallast Farsæld barna og þar má finna nánari upplýsingar um hvað löggjöfin felur í sér og hvert hlutverk tengiliða er. Einnig má sjá aðgengilegt myndband sem lýsir í stuttu máli því sem lögin innibera.
Samkvæmt lögunum eiga börn og foreldrar að hafa greiðan aðgang að þeirri þjónustu sem þau þurfa og að þau fái rétta aðstoð á réttum tíma, frá réttum aðilum. Með því að tengja þjónustuna saman og vinna í sameiningu að farsæld barna verður auðveldara fyrir börn og foreldra að fá aðstoð við hæfi.
Börn og foreldrar þeirra hafa aðgang að tengilið í skóla. Á heimasíðu skólans, undir flipanum Farsæld barna, má sjá hverjir hafa hlutverk sem tengiliðir í Síðuskóla. Hlutverk tengiliðar er fyrst og fremst að veita upplýsingar, aðstoða foreldra og barn og styðja við samþættingu á fyrsta stigi í samræmi við óskir foreldra og/eða barns. Í flóknari málum hafa börn og foreldrar aðgang að málstjóra hjá velferðarsviði Akureyrarbæjar eða þar sem þarfir barns liggja hverju sinni. Foreldrar og börn geta leitað sjálf beint til tengiliðar eða sent beiðni í gegnum Þjónustugátt Akureyrarbæjar.
Með góðri farsældarkveðju,
Helga Vilhjálmsdóttir, innleiðingarstjóri farsældarlaga á fræðslu- og lýðheilsusviði
Kristín Jóhannesdóttir, sviðsstjóri fræðslu- og lýðheilsusviðs
Ólöf Inga Andrésdóttir, skólastjóri Síðuskóla
Aðalfundur FOKS
25.09.2023
Aðalfundur Foreldra- og kennarafélags Síðuskóla FOKS verður haldinn þriðjudaginn 26. september klukkan 20 í stofu B7 (gengið inn um íþróttahús).
Dagskrá aðalfundar verður sem hér segir:
1. Kosning fundarstjóra og fundarritara
2. Skýrsla stjórnar
3. Ársreikningur félagsins lagður fram
4. Kosning í stjórn - núverandi stjórn gefur kost á sér áfram
5. Kosning í nefndir - vantar þrjá nýja aðila í Skólaráð
6. Ákvörðun um árgjald félagsins
7. Önnur mál
Stjórn FOKS vonast til að sjá sem flesta á fundinum. Ef einhver hefur áhuga á að vera í skólaráði en kemst ekki á fundinn hafið endilega samband í tölvupósti á magneak@akmennt.is fyrir 26. september.
Kveðja, stjórn FOKS.
