ÍSAT

Mikið hefur snjóað á Norðurlandi síðastliðinn sólarhring. Krakkarnir í 5. bekk nýttu tækifærið og bjuggu til stærðarinnar snjókarl.  Hér sjást þau ánægð með verkið.   

Skólanum barst góð gjöf frá Foreldra-og kennarafélagi Síðuskóla, FOKS í dag. Nokkrir stjórnar­menn komu með sex spjaldtölvur sem þeir hafa safnað peningum fyrir með því að fara milli fyrirtækja á Akureyri. Með í förinni var  Elín Dögg Gunnarsdóttir rekstrarstjóri  Dekkjahallarinnar  en Dekkjahöllin gaf eina af þessum tölvum.  Þetta er virkilega kærkomin gjöf til að auka fjölbreytnina  í kennslunni. Alls hefur foreldrafélagið fært skólanum 10 spjaldtölvur af Samsung gerð í vetur. Ekki ónýtt að hafa svona bakhjarl.

Ungmennaráð Unicef á Íslandi og SAMTAKA á Akureyri ætla að standa fyrir leikfangabasar fyrir börn á Glerártorgi, laugardaginn 22. mars, frá kl. 13-17. Börnin geta komið með leikföng á skrifstofu skólans og fá stimpil í kort í staðinn. Síðan geta þau valið sér leikföng á skiptimarkaðnum og þar gildir, einn stimpill = einn hlutur. Eða komið með leikföng á skiptimarkaðinn sjálfan og fengið önnur í staðinn. Nánari upplýsingar.

Í gær fór fram lokahátíð Stóru upplestrakeppninnar í 7. bekk. Þar lásu átta nemendur úr 7. bekk og þurfti að velja fulltrúa skólans sem taka þátt í lokakeppninni sem fram fer í Menntaskólanum á Akureyri miðvikudaginn 2. apríl. Dómnefnd skipuðu Helga Hauksdóttir og Jenný Gunnbjörnsdóttir. Eftir nokkrar yfirlegu valdi dómnefndin Emelíu Kolku Ingvarsdóttur og Jörund Traustason sem aðalfulltrúa skólans og til vara var valin Fanney Rún Stefánsdóttir. Hér má sjá myndir sem voru teknar á lokahátíðinni, þar sem allir 7. bekkingar fengu afhent viðurkenningarspjöld fyrir þátttökuna.

Við héldum upp á að nemendur hafa safnað 15.000 hrósmiðum. Af því tilefni fengum við tónlistarmenn í heimsókn og allur skólinn mætti á sal og söng með þeim. Það sést á myndunum að nemendur og starfsmenn kunnu vel að meta Magna og Rúnar Eff.

Nú hafa fleiri myndir bæst við frá árshátíðinni. Ljósmyndari er Benedikt Sigurgeirsson.

Miðvikudaginn 12. mars nk. verður haldin kynning á verkefninu Söguskjóður í bæjarstjórnarsalnum í Ráðhúsinu. Söguskjóður er foreldraverkefni sem hefur verið unnið á leikskólunum á Dalvík með góðum árangri en sérstök áhersla er á að fá foreldra af erlendum uppruna inn í verkefnið enda ljóst að jákvæð viðhorf og stuðningur foreldra er lykilatriði í farsælli skólagöngu barna. Verkefnið gengur út á að foreldrar koma inn í leikskólana að skóladegi loknum og búa til málörvandi gögn tengd barnabókum á íslensku undir leiðsögn verkefnastjóra og kennara leikskólans, boðið er upp á barnagæslu á öðru svæði leikskólans meðan á vinnunni stendur. Verkefnið er byggt á hollenskri fyrirmynd og má heimfæra hugmyndafræðina á grunnskóla, hverfamiðstöðvar eða aðrar stofnanir. Verkefnið hefur margþætt markmið:  það eykur tengsl foreldra við leikskóla/grunnskóla og eflir öryggi foreldra í sambandi við starf skólanna það ýtir undir að foreldrar kynnist sín á milli, uppgötvi nýjar hliðar hvers annars og að þeir blómstri í starfi með leikskólanum óháð tungumáli það styður við íslenskukunnáttu erlendra foreldra það verða til góð málörvandi gögn í skólunum sem öllum foreldrum er síðar boðið að fá lánuð heim til að vinna með börnum sínum það ýtir undir bóklestur barna og skemmtilegar samverustundir barna og foreldra við lestur, leik og spil Verkefnið er styrkt af Þróunarsjóði innflytjendamála og fékk nýlega viðurkenningu fyrir nýsköpun í opinberri þjónustu. Það hefur einnig verið kynnt á morgunverðarfundi um innflytjendamál á vegum Mennta- og menningarmálaráðuneytisins og á fleiri stöðum.