ÍSAT

Nú er skólaárið á enda og lauk því með umhverfisdögum þar sem námið fór fram utandyra. Það má með sanni segja að veðrið hafi leikið við okkur þessa daga en seinni daginn var endað á grillveislu í stóra inngarðinum í rjómablíðunni sem sést á þessum myndum. Útskrifaðir voru 54 nemendur frá skólanum og óskum við þeim til hamingju og velfarnaðar á nýjum vettvangi. Að lokum viljum við þakka ykkur fyrir ánægjulegt samstarf í vetur og vonum að þið hafið það gott í sumarleyfinu. Skólinn hefst að nýju með  skólasetningu þann 21. ágúst. Með sumarkveðju, Starfsfólk Síðuskóla

Í dag var síðasta umbun skólaársins hjá 6. bekk. Þessir hressu krakkar létu rigningu og heldur svalt veður ekki stoppa sig í að fara í sápufótbolta úti. Gunni húsvörður útbjó þennan fína völl og svo var spilaður fótbolti með miklum tilþrifum. Í lokin var boltanum hent útaf og allir skemmtu sér saman. Hér má sjá fullt af skemmtilegum myndum!

Eins og fram kom í fréttabréfinu eru umhverfisdagar 4. og 5. júní. Þá munu árgangar fara um bæinn og nágrenni hans og læra á umhverfið og leika sér í leiðinni. Skóladegi lýkur 12:30 þessa daga. Dagskrá hjá hverjum árgangi má sjá hér.

Í síðustu viku bauð foreldri  nemanda í 2. bekk okkur á hestbak. Við fórum hjólandi upp í hesthúsahverfi en þegar þangað var komið fengu allir að prófa að fara á bak stuttan hring. Við sáum marga fallega hesta og fengum Svala og snúð. Þetta var mjög skemmtileg ferð en það komu ekki allir alveg heilir heim því það urðu nokkur minniháttar hjólaslys á leiðinni heim. Ekki alvarleg þó sem betur fer. Í fyrradag komu svo krakkarnir úr 2. bekk í Giljaskóla í heimsókn til okkar. Við borðuðum saman nestið og fórum svo út að kríta. Þá varð þessi líka risastóri Óli prik til! Hér má sjá myndir frá atburðunum.

Undanfarna daga hafa nemendur í 4. - 7. bekk tekið þátt í frjálsíþróttamóti grunnskólanna í Boganum.  Allir árgangar hafa staðið sig vel með því að taka þátt og leggja sig fram með bros á vör.  Myndin er af 7. bekkingum sem sigruðu jafnaldra sína úr öðrum skólum með glæsibrag og hér eru fleiri myndir frá keppni þeirra.

Stór hópur úr 9. bekk í Síðuskóla gekk á Súlur í morgun í blíðskapar veðri. Ferðin tókst mjög vel og gleði skein af andlitum krakkanna þegar þeir náðu toppnum. Margir renndu sér á rassinum niður og gaman var að stoppa í stóru gili og láta sig gossa fram af brún þess.    Myndir úr göngunni má sjá hér.  

2. bekkur hefur s.l. 2 vikur verið að læra um heimabæinn okkar Akureyri. Í gær var farið í vettvangsferð til þess að skoða styttuna af Helga magra og Þórunni hyrnu, fyrsta landnámsfólkinu okkar og leikskólann sem heitir í höfuðið á dóttur þeirra hjóna, Hólmasól. Í leiðinni skoðuðum við þekktar byggingar eins og Ráðhúsið, Sjallann, Amtsbókasafnið, Lögreglustöðina og Akureyrarkirkju.  Við töldum kirkjutröppurnar og flestir voru sammála um að þær væru 109 talsins. Nemendur höfðu gaman af ferðinni og voru fjörugir eins og kálfar að vori.

Þau stóðu sig frábærlega í úrslitum Skólhreysti á föstudag, Melkorka Ýrr, Inga Sól, Hrannar og Svavar öll úr 10. bekk. Sigurður og Harpa einnig úr 10. bekk voru varamenn og tilbúin til að taka við ef eitthvað hefði komð uppá.  Það fór full rúta af stuðningsmönnum suður og var mjög góð stemning í hópnum. Síðuskóli náði 4. sæti sem er  mögnuð frammistaða hjá þeim og hafa krakkarnir sýnt ótrúlega framfarir í vetur. Landsbankinn styrkti Skólahreysti og stemningin á úrslitunum sést vel á myndunum hér.