ÍSAT

í vetur fórum við á stað með hringekju í 6. og 8. bekk.  Hringekjan er hugsuð þannig að nemendur velja sér meira inní greinarnar þ.e.a. s. smíðar, textilmennt og myndmennt og eru ákveðnar vikur í hverri grein.  8. bekkur hefur verið að smíða fígúrur og er það verkefni búið eftir það fóru þau í brúðuleikhúsgerð sem er samþætt með dönskunni. Þemað er ævintýrið Eldfærin.  6. bekkur hefur verið í greinunum til skiptis. Síðustu vikur hafa nemendur verið að gera gipsgrímur, smíðavinnu og vinna með leir Hér má sjá myndir frá vinnunni þeirra. Gunnella, Guðfinna og Gulli 

Í dag var jólaföndur á yngsta stigi. Margir foreldrar litu við og boðið var upp á vöfflukaffi. Mörg listaverk litu  dagsins ljós eins og jólamyndir, jólatré, snjókorn og margt fleira tengt jólahátíðinni sem nálgast óðfluga.  Myndir má sjá hér.

Nemendur úr 3. og 4. bekk hafa undanfarnar 4 vikur farið í Skautahöllina og fengið skautakennslu með frábærum árangri. Nemendurnir lögðu sig mikið fram og lærðu heilmikið. Allir stóðu sig virkilega vel og höfðu mjög gaman af þessari tilbreytingu.  Rainer Jessen íþróttakennari, sem kenndi þeim á skautum, tók nokkrar myndir sem hægt er að skoða hér.

Það sést á skólastarfinu að jólin nálgast. Byrjað er að skreyta stofurnar. Margar skrautlegar útgáfur af póstkössum eru farar að birtast fyrir utan stofur. Bekkir eru farnir að heimsækja Glerárkirkju og fá þar fræðslu o.fl. Jólaföndur hefur farið fram á göngunum og margt skemmtilegt skapað. Hér má sjá myndir af áhugasömum nemendum og niðursokknum kennurum í allskonar föndri og framleiðslu.

Í dag, föstudaginn 30. nóvember, kom Þorgrímur Þráinsson í heimsókn í Síðuskóla. Hann byrjaði á að heimsækja unglingadeildina og spjalla við nemendur þar. Síðan las hann upp úr nýju bókinni sinni, Krakkinn sem hvarf, fyrir 4.-6. bekk. Þegar Þorgrímur hafði lokið lestrinum og svarað spurningum nemenda bættust allir hinir bekkirnir við og allur skólinn var saman á sal. Unglingarnir sýndu þá atriðin þrjú sem komust áfram í hæfileikakeppni Samfés og að lokum sungu allir saman íslensku lögin þrjú sem voru sungin um allt land í tilefni af Degi íslenskrar tónlistar 1. desember. Lögin voru: Jólakötturinn eftir Ingibjörgu Þorbergs, Spáðu í mig eftir Megas og Á Sprengisandi eftir Sigvalda Kaldalóns við ljóð Gríms Thomsen.

Það voru skrautlegir nemendur sem mættu í skólann á meðan að ÖÐRUVÍSI vikan var í gangi.  Flottar grímur og glæsileg spariföt. Höfuðfatadaginn nýttu margir til að hafa húfurnar sínar innandyra og á jóla-rauða deginum mátti sjá rauða litinn hvert sem litið var.  Nokkrar skemmtilegar myndir eru hér.

Þessa dagana gera rithöfundar víðreist og mæta m.a. í skólana og lesa upp úr bókum sínum fyrir nemendur. Gunnar Helgason var hjá okkur nýlega eins og sjá má annars staðar á síðunni og 22. nóvember mætti Brynhildur Þórarinsdóttir og las upp úr nýrri bók sinni um Blávatnsorminn fyrir 1. - 4. bekk.. Þorgrímur Þráinsson mætir síðan á föstudaginn 30. nóvember og les fyrir Síðuskóla. Þetta er skemmtilegur fyrirboði jólanna sem nú nálgast óðfluga.

  Fimmtudaginn 22. nóvember verður ball fyrir 1.-7. bekk í Síðuskóla. Það er á vegum 10. bekkjar og til styrktar vorferðalagi árgangsins.   Ballið er þrískipt. 1. og 2. bekkur er klukkan 16:00-17:30 3. og 4. bekkur er klukkan 17:30-19:00 5.-7. bekkur er klukkan 19:00-21:00 Það kostar 300 krónur á ballið og sjoppa er á staðnum. 10. bekkur

Í dag kom Gunnar Helgason í heimsókn í Síðuskóla og las upp úr nýju bókinni sinni ,,Aukaspyrna á Akureyri". Nemendur 4. - 10. bekkja mættu allir á sal og virtust allir hafa jafn gaman af að hlusta á upplesturinn hjá Gunnari.

Á vefinn eru komin þrjú rit af sex um grunnþætti menntunar. Mennta- og menningarmálaráðuneytið gefur út í samstarfi við Námsgagnastofnun rit um grunnþætti í menntun. Grunn-þættirnir eru kynntir í nýjum aðalnámskrám leikskóla, grunnskóla og framhaldsskóla 2011.  Grunnþættirnir eru: Læsi í víðum skilningi Sjálfbærni Heilbrigði og velferð Lýðræði og mannréttindi Jafnrétti Sköpun Grunnþættirnir snúast um læsi á samfélag, menningu, umhverfi og náttúru; einnig um framtíðarsýn, getu og vilja til að hafa áhrif og taka virkan þátt í að viðhalda samfélagi sínu, breyta því og þróa. Þeim er ætlað að undirstrika meginatriði í almennri menntun, stuðla að samfellu í skólakerfinu og ná til starfshátta, inntaks og námsumhverfis á öllum skólastigum. Heftunum er m.a. ætlað stuðla að því að grunnþættirnir verði leiðarvísar í skólastarfinu, auðvelda starfsfólki skóla, kennurum og skólastjórum að átta sig á inntaki þeirra og flétta þá inn í skólastarfið. Ekki er um beinar kennsluleiðbeiningar að ræða heldur má finna í þeim stutta fræðilega umfjöllun um hvern þátt, hugmyndir um leiðir og hagnýtar ábendingar. Að þessu sinni koma út þrjú rit, um sköpun, læsi og lýðræði og mannréttindi. Stefnt er að því að seinni þrjú ritin komi út í byrjun næsta árs. Öll ritin eru gefin út á rafrænu formi og í takmörkuðu upplagi á prentuðu formi. Rafrænu útgáfuna má nú nálgast í útgáfuskrá ráðuneytisins og vef Námsgagnastofnunar.  Grunnþættir menntunar – Læsi Grunnþættir menntunar – Sköpun Grunnþættir menntunar – Lýðræði og mannréttindi