Fréttir

Skólaslit Síðuskóla verða fimmtudaginn 5. júní.

Árgangar mæta í heimastofur og fara saman í sal. Þar kveður skólastjórinn fyrir hönd skólans og síðan fara nemendur í sínar heimastofur þar sem hópurinn er kvaddur. Foreldrar eru að sjálfsögðu velkomnir með sínum börnum. Við miðum við að skólinn sé í eina klukkustund.

• Klukkan 9:00 1.-5. bekkur
• Klukkan 10:00 6.-9. bekkur

Útskrift 10. bekkjar kl. 15:00 í Glerárkirkju og kaffi í skólanum á eftir fyrir nemendur, fjölskyldur þeirra og starfsfólk.

Það er gaman að segja frá því að Sámuel, nemandi í 9. bekk í Síðuskóla sem kom til okkar frá Ungverjalandi síðasliðið sumar, hefur nýlokið keppni í heimalandinu. Keppt er í ungverskri málfræði á landsvísu í bekkjum 5. - 8. (sem er 6. - 9. bekkur á Íslandi). Það er skemmst frá því að segja að Sámuel var í 9. sæti á landsvísu sem er frábær árangur og til að kóróna það fékk hann sérstaka viðurkenningu fyrir framúrskarandi árangur í málfræðikeppninni öll árin sem hann hefur tekið þátt. 

Að sjálfsögðu mætti hann í keppnina Síðuskólapeysunni sinni 😀

 Við óskum Sámuel og fjölskyldu hans til hamingju með árangurinn. 

Fjör á síðasta söngsal vetrarins hjá yngsta stigi eins og sjá má á myndum hér. 

1. bekkur fékk að opna stundina með tveimur lögum sem þau hafa verið að æfa. Heimir tók svo við með vinsælustu lög vetrarins og allir tóku vel undir. Alltaf gaman að syngja svolítið. 

6. bekkur skemmti sér konunglega í vikunni sem leið þegar hann tók út tvöfalda umbun í formi vatnsslags og sápurennibrautar á skólalóðinni. Gaman þegar veðrið spilar með í að verðlauna vinnusama nemendur.

Sjá myndir hér.

Í dag var haldið Barnaþing Síðuskóla í fyrsta sinn. Þingið er liður í því að vera Réttindaskóli Unicef. Hvert stig fundaði saman og fjölluðu nemendur um ýmsar spurningar sem snúa að hagsmunum þeirra í skólastarfinu, frístund og félagsmiðstöðinni. Nemendum var skipt niður á borð og róteruðu á milli borða og þannig höfðu allir tækifæri til að svara öllu spurningum. Réttindaráðið vann spurningarnar úr könnunum sem nemendur hafa svarað í vetur. Réttindaráð samanstendur af fulltrúum nemenda úr öllum árgöngum og starfsfólki. Þetta er liður í því að auka áhrif nemenda á skólagöngu sína og félagsstarf. Unnið verður úr þinginu á komandi skólaári.

Sjá myndir hér.

Litla upplestrarkeppni 4. bekkjar var haldin á sal í gær. Keppnin er uppskeruhátíð nemenda, foreldra og kennara sem hafa unnið í samvinnu og markvisst með íslenska tungu og upplestur síðan keppnin var sett formlega á Degi íslenskrar tungu, 16. nóvember síðastliðinn. Það er skemmst frá því að segja að nemendur stóðu sig hreint frábærlega og fluttu þulur og bundið mál bæði í söng og framsögn. Það var virkilega ánægjulegt að hlýða á og greinilegt að þau hafa æft sig vel í vetur.

Sumum finnst skrýtið að nota orðið “keppni” þar sem enginn einn stendur uppi sem sigurvegari. Mikilvægt er að muna að keppnishugtakið í þessu verkefni felur einungis í sér að verða betri í lestri og framkomu í dag en í gær. Það er mikilvægt að geta bæði keppt að betri árangri og sett sér markmið án samkeppni við aðra en sjálfan sig. 

Litla upplestrarkeppnin er afkvæmi Stóru upplestrarkeppninnar eða Upphátt eins og hún er kölluð á Akureyri. Góðar fyrirmyndir eru mikilvægar og því voru fulltrúar okkar í þeirri keppni, þær Katrín Birta og Sóley Katla úr 7. bekk, fengnar til að lesa ljóð að þessu tilefni. 

Sjá myndir hér.

Nemendur í 9. bekk völdu að fara sápubolta sem umbun. Þau skemmtu sér vel og var þetta kærkomin tilbreyting í veðurblíðunni. 

Hér eru fleiri myndir.

Fulltrúar Síðuskóla náðu frábærum árangri í gærkvöldi í Fiðringi 2025 eða 2. sæti. Keppnin fór fram í Hofi og tóku tíu skólar þátt að þessu sinni. Mikil áhersla er lögð á að hugmyndin og útfærslan sé alfarið unglinganna sjálfra og einnig sjá þau um tæknimál og búninga, leikmynd og förðun. Atriði Síðuskóla heitir Það sem gerist í sjónum. Atriðið fjallar um þá ógn sem steðjar að sjávarlífverum vegna plastúrgangs og annarra mengandi efna sem berast í hafið. Atriðið hvetur áhorfendur til umhugsunar um mikilvægi umhverfisverndar og sjálfbærni. Atriðið og búningarnir voru glæsilega útfærðir enda uppskáru okkar konur eftir því. Óskum þeim til hamingju og hlökkum til að sjá meira á næsta ári.

Myndir frá kvöldinu og æfingaferlinu hér.

Það var metþátttaka í 1. maí hlaupinu í ár sem fram fór við frábærar aðstæður. Í þátttökukeppni grunnskóla bar Síðuskóli sigur úr býtum í flokki fjölmennari skóla með 19% þátttöku.  

Á myndinni má sjá hluta nemenda Síðuskóla. 

Lið Síðuskóla lenti í 3. sæti í undankeppni Skólahreysti sem fram fór í Íþróttahöllinni í kvöld. Keppnin var æsispennandi og hnífjöfn, en aðeins eitt stig skildi á milli sigurliðsins frá Lundarskóla og liðanna sem enduðu í 2. og 3. sæti.

Við erum afar stolt af  frammistöðu okkar keppenda þeim Sóldísi, Kára, Höllu og Patreki ásamt varamönnunum Elíasi og Kolbrúnu Svönu sem öll stóðu sig gríðarlega vel og sýndu mikla liðsheild og keppnisanda.