Fréttir

10. bekkur stefnir á að fara í skólaferðalag til Skagafjarðar í vor. Hluti af fjáröflun bekkjarins er að selja peysur merktar Síðuskóla. Endilega kaupið góðar peysur og styrkið 10. bekk í leiðinni.

Fræðslu- og lýðheilsusvið Akureyrarbæjar veitti á dögunum viðurkenningar fyrir framúrskarandi starf í skólum bæjarins. Markmiðið með viðurkenningunum er að benda á og lyfta upp því frábæra starfi sem fram fer í skólunum og hvetja til góðra verka.
Frá okkur í Síðuskóla hlutu þær Ólöf Inga skólastjóri og Victoria Irkha nemandi í 9. bekk viðurkenningu. Meðal þess sem nefnt var um Ólöfu er að gott sé að leita til hennar, hún hafi skapað notalegt umhverfi fyrir nemendur og starfsfólk og byggt upp á faglegan og metnaðarfullan hátt sérdeild skólans með sínu starfsfólki. Í umsögn Victoriu sem kom í skólann frá Úkraínu haustið 2023 kom fram að hún sé dugleg, sýni mikinn metnað í námi, sá ávallt jákvæð og hafi lagt sig fram og sýnt mikinn áhuga á íslenskunámi og hafi á stuttum tíma náð afar góðum tökum á íslensku.
Við óskum þeim til hamingju og erum afskaplega stolt af því að hafa þær í okkar frábæra hópi.

Fram til 28. mars er börnum á aldrinum 6-12 ára (1.-7. bekkur) boðið að kjósa uppáhalds barnabækur ársins. Í Síðuskóla fer kosningin fram á bókasafninu, þar hanga uppi veggspjöld með öllum bókum ársins 2024. Á atkvæðaseðlinum má velja eina til þrjár barna og/eða unglingabækur sem þeim finnast skemmtilegastar, áhugaverðastar eða bestar af hvaða ástæðu sem er. Samhliða kosningu um Bókaverðlaun barnanna er líka kosið um Myndlýsingu ársins. Myndir geta verið magnaðar og aukið áhrif sagna. Þær geta verið fyndnar, óhugnanlegar, sorglegar eða sýnt okkur skemmtileg smáatriði sem ekki standa í textanum. Tilnefndar bækur eru á veggspjaldinu Myndlýsing ársins og er einnig að finna á bókasafninu. Amtsbókasafnið á Akureyri tekur svo við kjörseðlunum og dregur jafnframt einn heppinn þátttakanda úr hverjum skóla sem fær bók að gjöf.

Síðastliðinn föstudag, 21.2., á Alþjóðadegi móðurmálsins fór hópur fjöltyngdra barna með ÍSAT kennurum skólans á Amtsbókasafnið. Þar hefur ýmislegt spennandi verið gert alla vikuna af því tilefni. 

Krakkarnir merktu upprunalandið sitt á heimskort, skrifuðu “bros” á sínu móðurmáli og fengu að skoða bókakost safnsins svo eitthvað sé nefnt. Sumir vildu spila og aðrir sýndu barna- og unglingabókum á erlendum tungumálum mikinn áhuga. 

Heimsóknin var mjög skemmtileg og þökkum við fyrir góðar móttökur á Amtsbókasafninu.

Hér má sjá myndir frá þessari skemmtilegu heimsókn.

Við í Síðuskóla erum öll að taka þátt í lestrarátaki þessa dagana, nemendur og starfsfólk. Við erum að keppast við að lengja lestrarorminn okkar og markmiðið er að ná yfir 200 metra og láta hann hlykkjast um sem flesta ganga skólans. Við byrjuðum í síðustu viku og erum strax komin með 54 metra og 675 miða. Við ætlum að vera í þessu út mars þannig það verður spennandi að sjá hve langan orm okkur tekst að búa til í sameiningu og hvort við náum jafnvel að hringa hann :) Hver árgangur er með sinn lit þannig að hann verður litríkur fyrir alla árganga skólans og starfsfólkið er með sinn eigin.

Sjá flotta orminn okkar hér

Undirbúningur fyrir Skólahreysti er hafinn í Síðuskóla og nemendur fá nú tækifæri til að æfa sig í ýmsum greinum keppninnar. Æfingar fara fram í frímínútum á föstudögum, þar sem nemendur geta mætt og æft styrk, þol og þrautseigju undir leiðsögn kennara.

Auk þess er stöðvavinna í íþróttum hjá 8.–10. bekk sérstaklega sniðin að undirbúningi fyrir keppnina, svo allir fái tækifæri til að spreyta sig í keppnisgreinum. 

Skólahreystikeppnin sjálf fer fram þann 30. apríl næstkomandi. 

Hér má sjá fleiri myndir. 

Síðuskóli fékk skemmtilega heimsókn í morgun þegar Ágúst, sem komst áfram í Söngvakeppninni um síðustu helgi, hélt smá söngsal með nemendum og starfsfólki skólans. Óhætt er að segja að heimsóknin vakti mikla lukku og greinilegt að Ágúst á marga aðdáendur í Síðuskóla. Ágúst tók nokkur lög, þar á meðal skólasöng Síðuskóla, nokkur gömul og sígild og svo auðvitað besta lagið" Eins og þú" sem nemendur tóku vel undir svo undir tók. Eftir söngsalinn var örtröð í eiginhandaáritun og myndatökur með kappanum. Gaman að segja frá því að einn höfunda lagsins er fyrrum nemandi Síðuskóla, hann Hákon Guðni Hjartarson. Við þökkum fyrir heimsóknina og óskum þeim góðs gengis í lokakeppninni.
Sjá myndir hér.

Unglingastig Síðuskóla fékk heimsókn og kynningu frá AFS á dögunum. AFS eru alþjóðleg samtök um skiptinám og býður uppá skiptinám í yfir 40 löndum. Afla má nánari upplýsinga á heimasíðu samtakanna afs.is en þar kemur fram að þar gefist ungu fólki tækifæri til að kynnast fjarlægri mennningu og að gerast skiptinemi sé ógleymanleg og þroskandi lífsreynsla.

Gleði og góður andi ríkir í íþróttasal Síðuskóla á miðvikudögum þegar hópur eldri borgara hittist á Ringó æfingum undir formerkjum Virkra efri ára. Meðal þátttakenda er Ólafur B. Thoroddsen fyrrum skólastjóri Síðuskóla, sem tekur að sjálfsögðu virkan þátt í leiknum.

Eftir góða æfingu sameinast Ringó-hópurinn nemendum skólans í matsalnum þar sem þau njóta hádegisverðar með nemendum skólans. Hér má sjá nokkrar myndir frá æfingunni í íþróttasalnum í morgun.