ÍSAT

Í dag var þemadagur í skólanum þar sem þema dagsins var læsi. Nemendum var blandað í hópa þvert á árganga þar sem nemendur úr hverjum árgangi voru í öllum hópum. Viðfangsefnin voru fjölbreytt og skemmtileg, t.d. gerð bókamerkja, tilvitnanir úr bókum voru skrifaðar upp og límdar á gólfin, unnið með veður læsi og spurningakeppni sem reyndi á merkjalestur svo dæmi séu nefnd. Nemendur voru til fyrirmyndar og þeir eldri fundu til sín þegar þeir gátu aðstoðað þá yngri. Hér má sjá myndir frá deginum.

Í morgun var söngsalur. Allir nemendur komu saman á sal og sungu lög sem 2. og 7. bekkur völdu. Systa spilaði undir nokkur lögin á gítar en með aðstoð tæknimannanna Snævars og Kristjáns var undirspil annarra laga af youtube. Í lok söngsals afhenti Ólöf Inga skólastjóri Huldu Margréti Sveinsdóttur, formanni nemendaráðs nýjan SMT fána þar sem sá gamli var orðinn veðraður og lúinn. Nemendur í nemendaráði fóru síðan út og tóku gamla fánann niður og flögguðu þeim nýja. Hér eru myndir frá söngsalnum og nemendaráði.

Nú er komið nýtt fréttabréf fyrir nóvember mánuð. Það má finna hér. Í þessu fréttabréfi er m.a. fjallað um læsi, verkefnið jól í skókassa og birtar myndir frá bleikum degi í október. Þá er matseðill mánaðarins á sínum stað.

Hér í Síðuskóla hefur skapast sú hefð að nemendur í 7. bekk taka þátt í verkefninu Jól í skókassa. Nemendur unnu  saman í hópum, byrjað var á því að pakka skókassa inn í jólapappír. Í kassann voru settar gjafir fyrir krakka á ákveðnum aldri og fyrir annað hvort stelpur eða stráka. Hóparnir komu með dót að heiman og keyptu það sem upp á vantaði. Pakkarnir verða síðan sendir til  Úkraínu til barna sem búa við slæm skilyrði.  Hér má sjá myndir af nemendum við að pakka og flokka gjafir.

Þriðjudaginn 20. október og miðvikudaginn 21. október eru viðtalsdagar í skólanum. Frístund er opin fyrir þá nemendur sem þar eru skráðir. Skipulagsdagar eru fimmtudaginn 22. október og föstudaginn 23. október og er frístund lokuð þá daga. Mánudaginn 26. október er haustfrí og er frístund opin. Á meðan viðtalsdögum stendur verður sýning á munum nemenda úr list- og verkgreinum á göngum skólans. Hér má sjá sýnishorn. Skóli hefst aftur þriðjudaginn 27. október samkvæmt stundaskrá. Hafið það gott í fríinu sem framundan er!

Hér má sjá myndir frá bleikum degi. Nemendur og starfsmenn voru hvattir til að mæta í bleiku til að sýna samstöðu í baráttunni gegn krabbameini.

Mánudaginn 12. október komu báðir 9. bekkirnir í heimsókn í 1.bekk og spiluðu við nemendur þar og eins aðstoðuðu unglingarnir yngstu nemendur í stærðfræði.   Báðir árgangarnir voru spenntir fyrir þessu uppbroti og óhætt er að segja að þetta hafi tekist vel.  Svo skemmtilega vill til að það eru fern systkinapör í þessum bekkjum og voru yngri systkinin ákaflega glöð að fá þau eldri í heimsókn.   Allir krakkarnir stóðu sig frábærlega og unnu vel saman.  Þau eldri voru góð fyrirmynd fyrir þau yngri, aðstoðuðu, hrósuðu og voru sallaróleg með þeim.  Unglingarnir voru ánægðir með þetta eftir á, fannst þetta skemmtilegt uppbrot og gaman að vera með þeim yngstu. Hér eru nokkrar myndir sem teknar voru í tímunum.

Í dag komu góðir gestir frá íþróttafélaginu Akri færandi hendi en þeir gáfu skólanum nýja borðtennisspaða. Þeir koma sér vel þar sem foreldrafélagið gaf skólanum nýtt borðtennisborð við upphaf skólaárs. Íþróttafélagið Akur er með æfingar mánudaga 16:30-18:00, miðvikudaga og föstudaga 17:00-18:30 og er öllum velkomið að koma og prófa.